De reis fan it famke is in aventoerlik mearke dat in laits opropt én yn it moed taastet. Foar jong en âld en elkenien dy’t fragen hat oer it doel fan de syktocht yn it libben. In famke ferlit har swantsje en waarme eilân om te sykjen nei in suske. Op de rêch fan in walfisk doarmet se oer grutte seeën en stekt ûnderweis oan op ferskate eilannen. Se moetet frjemde minsken, lykas in man dy’t op reinwetter sit. De bisten dy’t se treft ha ek har nuveraardichheden, lykas in ûltsje dat gjin pykjes ha wol om’t se leaver in kniperke docht yn de waarme sinne. De moetings mei al dy bjusterbaarlike wêzens roppe nije fragen by it famke op: wat jout wearde oan it libben? Is in suske it antwurd? De susters Lautenbach ha tegearre dit orizjinele mearke skreaun en de ferrassende yllustraasjes makke.
Boekpresintaasje
Op sneontemiddei 30 novimber sieten de tribunes yn de kapel fan Museum Dr888en grôtfol. Sa’n lytse santich minsken wiene dêr yn Drachten by de boekpresintaasje fan De reis fan it famke, útjûn troch Utjouwerij DeRyp. De suskes Catharina en Hilleke Lautenbach makken dat ‘hjoeddeiske mearke’ mei syn beiden: Catharina skreau de tekst en Hilleke makke dêrby yllustraasjes.
It earste eksimplaar dan De reis fan it famke wie foar Martsje de Jong. Dy hat ek noch it stik foarlêzen út it boek. Op de foto nei de presintaasje: Martsje de Jong tusken Hilleke Lautenbach (links) en Catharina Lautenbach (rjochts):
Resinsje fan Jaap Krol yn it Friesch Dagblad
Resinsint Jaap Krol skreau op 24 febrewaris 2025 op de webside fan it Friesch Dagblad oer De reis fan it famke van Catharina en Hilleke Lautenbach, útjûn troch Utjouwerij DeRyp:
“Dat je yn krap 75 siden sa’n ferskaat oan faak orizjinele tinkwizen oproppe kinne fyn ik knap. […] Spesjaal omtinken freegje ek de kleurrike yllustraasjes, digitaal komponearre en opmakke yn in ferriederlike beukerstyl. Sa is De reis fan it famke in berneboek foar folwoeksenen en in folwoeksen boek foar bern.”
Lês de hiele resinsje hjir.