Mear ynformaasje oer Geller fan Gabriëlle Terpstra

Start/Winkel/Berjochten/Mear ynformaasje oer Geller fan Gabriëlle Terpstra

Nei har debút as dichter mei Tsjintwurdich is alles better yn 2024 set Gabrielle Terpstra in folgjende stap yn har skriuwerskip. De podcastmakker en auteur, ûnder mear bekend fan Gabrielle en Arjan bedoele it net ferkeard en de kollums op Goeie.frl, komt no mei har earste roman: Geller.

Terpstra hat in ynkringende persoanlike skiednis dy’t gauris trochklinkt yn har kreative wurk. Har libben waard tekene troch ferslavingen yn har famylje, en al jong waard se sels ek mei dy wrakseling konfrontearre. Yn har profyl op de webside fan Tresoar lit Terpstra witte dat se graach oait nochris in boek skriuwe wol oer dy ûnderfiningen. Oft Geller dat ferhaal fertelt, kinne lêzers by de offisjele presintaasje sels ûntdekke.

Boekpresintaasje Geller fan Gabrielle Terpstra, Utjouwerij De Ryp | Moandei 10 novimber 2025, 19:30 oere (ynrin 19:00 oere) | Keunstnerspark Asgaard, Kealledykje 87 yn Ljouwert

Op moandei 10 novimber 2025 wie de boekpresintaasje fan Geller yn Keunstnerspark Asgaard (Kealledykje 87, Ljouwert). De jûn waard presintearre troch Dichter fan Fryslân Arjan Hut, mei wa’t Terpstra ek har podcast makket. Te gast wiene ûnder oaren Gysbert Japicxpriiswinner Elmar Kuiper, dy’t in koart ferhaal foarlêzen hat, en útjouwer Hille Faber, dy’t mear fertelde oer it ûntstean fan Geller. Gabrielle lies in fragmint foar út Geller.

Nei ôfrin wie der tiid om it boek te keapjen en wat te drinken, te snacken en koe it boek sinjeard wurden.

Anne-Goaitske Breteler oer Geller:

‘Geller fertelt mei pynlike earlikens hoe’t it libben derút sjen kin as emoasjes nea in namme hawwe meie. De effekten fan trauma’s, geastlik net-sûnwêzen en ferslavingen wurde miskien ferswijd, se wurde lykwols ûnûntkomber sichtber. Dat jout dit boek dan ek syn ûnferjitlike krêft. It is in rau, kwetsber en moedich ferhaal dat ûnder de hûd krûpt en datst noch lang fielen bliuwst.’

Sipke de Schiffart oer Geller:

‘In coming of age-roman dy’t yndruk makket. It op himsels drege ferhaal oer in ûngelokkige jeugd wurdt bjusterbaarlik goed ferteld en is lardearre mei prachtige observaasjes, anekdoates en aforismen. De skriuwster tsjinnet it allegearre op mei in saus fan drûge humor. It muoit my dat ik dit wurk sels net skreaun haw.’

Besprekken fan Geller

Jelle van der Meulen (oant oktober 2025 sekretaris fan de Stichting Utjouwerij deRyp) pleatste op syn Friese-literatuursite in besprek oer Geller
"De skynber achteleas optekene sinnen binne in fraai bewiis fan de nochteren, direkte en soms lakonike fertelwize fan dit boek."
"It is net it iennichste yn it moed taastende momint fan Geller. Mar watfoar ellinde Geller meimakket, hokker tryste wrâld fan útsichtleaze ferslaving it boek bytiden ek sjen lit, Geller is gjin swiermoedich boek. Net allinne de nochtere ferteltoan makket it ferhaal lichter. De skriuwster observearret hiel goed alderhande personaazjes en situaasjes en wit dy op in oansteklike wize te beskriuwen. By flagen binne dy beskriuwingen echt humoristysk."
"Op dizze fernimstige en ynkringende wize beskriuwt Gabriëlle Terpstra yn har debútroman it libben fan in jonge frou dy’t dan hjir, dan dêr wennet en dy’t te meitsje krijt mei tal fan helpferlieningsynstellingen. De roman ropt like faak ûngemak op as dat it yn it moed taast, en it is it bewûnderjen wurdich hoe stoer at de skriuwster dit ferhaal – foar in part har eigen ferhaal – helder en nochteren, mar likegoed hoopfol opskreaun hat."

Lês it hiele besprek hjir. Op de website Brekt staat de bespreking in het Nederlands: https://www.brekt.nl/koudum-in-de-friese-literatuu...

Martsje de Jong (op 15 novimber 2025 yn Op en út fan Omrop Fryslân) oer Geller’: It boek giet oer “in problematyske jeugd” en oer “drugs, drank, seks, alles derop en deroan”. ”Soest sizze: dat wurdt in ferskriklik swier boek. Dat is it absolút net!” Want: “Gabriëlle ferstiet de keunst om de dingen op in hiel lakonyke, hast achteleaze manier te fertellen mei swarte humor en de nedige selsspot”. Hear mear:

Doeke Sijens skreau foar de Leeuwarder Courant (28-11-2025) in besprek en joech 4 stjerren::

"It slagget de skriuwer knap om hieltyd ôfstân te hâlden en sa de ûnderfiningen fan Geller op hast koele wize te beskriuwen sadat de lêzer syn eigen miening foarmje kin."